15/3/2006
يدعوكم تجمع المستقلين المصريين – يد
لحضور الحفل الوطني لتكريم أمهات ضحايا النظام و ذلك في مناسبة الاحتفال بعيد الأم يوم الثلاثاء 21مارس2006 الساعة 5 عصرا -ميدان طلعت حرب – سنكرم أمهات ضحايا قمع النظام و فساده: أمهات شهداء العبارة المنكوبة – أمهات شهداء الانتخابات البرلمانية– أمهات شهداء محرقة مسرح بني سويف- أمهات شهداء اللاجئين السودانيين – أمهات المعتقلين – و غيرهن لا تبخل على أمهات الشهداء بوقتك و شاركنا بالحضور و تقديم و لو زهرة ، سنقول لكل أم فقدت ابنها بسبب النظام الفاسد أننا كلنا نتشرف أن نكون أبناؤكِ
بيان بالمصرية الدارجة :
وإحنا لما بنتشرف النهاردة بتكريم الأمهات دول فإحنا بنكرم في شخصهم كل أم مصرية ادت من عمرها و صحتها عشان تربي ابن ينفع عيلته و مجتمعه لكن سياسات النظام الحاكم و فساده حرمها حتى من شوفة ابنها بيشيل عنها ف الكبر… مات ف عبارة و لا حادثة إهمال، بنكرم كل أم و عيلة ضحية لسياسات النظام الفاشلة و استبداده .
بنكرم أمهات الملايين من الشباب العاطلين دون إرادتهم، ضحايا التخبط في السياسات الاقتصادية و عدم مراعاة البعد الاجتماعي و حقوق البسطا و الغلابة و المعدومين اللي الحكومة ساعات بتدلعهم و تسميهم محدودي الدخل، هو فين الدخل ؟؟ ده الغلاء سحب من الأسرة المصرية حتى حقها ف راحة البال و لمة سعيدة حوالين كوباية شاي – موش السكر برضه بقى ب 3 جنيه ؟ تعظيم سلام لك لأم بتدبر بميزانية محدودة مصاريف بيتها و أولادها.
بنكرم الأمهات المصريات من الريفيات الفقيرات اللي خدوا منهم بالزور و القوة قيراطين الأرض اللي بيزرعوهم من سنين لجل تكفيهم المذلة و سؤال اللئيم، و انعدمت أدامهم فرص الحياة الكريمة و الستر.
بنكرم الموظفة اللي ما بتقبلش تسكت على فساد رغم إن طريقه سهل دلوقتي و عيني عينك ف معظم الإدارات الحكومية ، لكنها تصر على الإنفاق من مرتب بسيط بس مال حلال.
بنكرم آلاف العاملات من ضحايا بيع القطاع العام و قفل المصانع اللي كانوا بيفنوا فيها زهرة شبابهم لجل 100 و لا 150 جنيه تساعد ع المعايش
بنكرم كل أم كان ابنها أو جوزها ضحية من ضحايا انتهاكات الحزب الحاكم و بلطجيته …
بنكرم في شخص أمهاتنا النهاردة كل ناشطة من متظاهرات الحركات الوطنية المطالبة بالتغيير
بنكرم كل صحفية بتحط مصلحة وطنها قبل حسابات الفلوس و المكافآت و بتكتب كلمة حق .
بنكرم كل ناشطة مصرية في الشأن العام حاصروا آمالها في حياة أفضل للبلد بسبب الاستبداد السياسي و إقصاء المعارضين و الانتقام منهم و من عوائلهم
انضم لينا و شارك معانا في تكريم أم مصرية من ضحايا النظام
هات معاك هدية بسيطة بسيطة إن شاء الله كارت أو وردة أو أي حاجة كان ممكن تديها لوالدتك عشان تدخل الفرحة على قلوب أمهات، منهم اللي قلبها محروق على ابن معتقل من أكتر من 15 سنة ، لا عارفة حي و لا ميت، بصحته و لا عتمة السجن و البهدلة خدت شبابه وعافيته، شارك تكريم الأمهات الحقيقيات اللي عانوا و ضحوا موش (بعض)الأمهات الملونين اللي بتكرمهم سوزان مبارك من فلوسنا، من الخزينة العامة للشعب، كرم أم مثالية حقيقية ، كرم أم ضحية، بيننا النهاردة أمهات منهم اللي أول مرة السنة دي موش ها تسمع من ابنها نور عينها كلمة كل سنة و انت طيبة يا أمي يا ست الحبايب>,
تعالى مع عيلتك و هات مامتك و حماتك،و إذا ما قدرتش تجيب هدية معاك للأمهات اللي ها ييجوا الحفلة، كفاية قوي مشاركتك و تمضية جزء من وقتك في يوم عيد الأم معانا.