إلى كل مصرى يهمه الأمر..

22/5/2006

باقى من الزمن ساعات على موعد وقفه القضاه المنتظرة يوم 25 من مايو.. فقط نذكرك بأن التضامن مع القضاة والمطالبة باستقلال السلطه القضائية أصبح وسيلتنا الوحيده الأن لتحقيق أولى خطوات العدل والحرية

فى بلادنا ولذلك ندعوك الأن أن تشاركنا برأيك وتدلى بصوتك
من خلال الاتصال على الرقم 00974 900 19 15
أو من خلال موقعنا الألكترونى www.shayfeen.com

( نعتذر عن عدم وجود أى رقم مصرى لإستقبال مكالمتكم ،لأن الشركات المصرية رفضت التعاون معنا )..

لاتنسوا: مرفق بهذا الإيميل شعار الحملة نرجوا طباعته ونشره وإرسالة إلى أى مواطن مصرى تعرفة “فهى دعوه لكل المصريين”
“سعر دقيقة المكالمة 3 جنيه مصرى”…

إيه رأيك لو تحسبها معانا و تشوف نزاهة القضاء هتفرق اد إيه في حياتنا؟
إيه اكتر حاجه ممكن تخاف عليها ؟؟
مستقبلك .. مستقبل اولادك ..
ممتلكاتك ..مدخراتك ..
طيب ولو حسيت ان كل ده ممكن يضيع منك فى لحظه هتعمل ايه ؟؟
هتصرخ .. هاتشتكى

طب هتشتكى لمين اذا كانت الجهه اللى المفروض تحفظلك حقوقك وتحكم بينك وبين اى حد فى بلدك بالعدل متكتفه ومتهمه ومتهانه ؟؟

متفكرش كتير لازم تقول لاءه .. لازم تدافع عن حقوقك ..من غير ما تثور ومن غير هتافات ولا شعارات،، تضامن مع القضاه” أخر أمل لينا وليك فى الإصلاح ” ..

وخليك فاكر دى أخر فرصه علشان تقف فيها صح ولو ضاعت هتعيش طول عمرك فى ظلم .. إنت ما بتطلبش غير حقك .. ولو فى لحظه حسيت إن صوتك مش هيغير كتير ..ياريت تبقى تسأل نفسك إحنا بنعمل ده كله ليه وأتكلفنا كل التكلفه دى علشان مين ؟؟

ولما ما تلاقيش سبب يخلينا نعمل كده غير خوفنا على مستقبلنا ،، ومستقبل اولادنا،، وممتلكتنا ..

اللى أكيد عندك زيهم ويمكن أكتر، وخايف عليهم زينا تمام يبقى أبسط حاجه تعملها إنك تتضامن معانا وترفع شعار العدل والحرية اللى لازم يكون شعار كل المصريين فى وقفه القضاه المنتظرة يوم 25 مايو ..

ولو مش عارف الوقفه دى ليه نقولك احنا …
الوقفه دى هيقف فيها كل القضاه اللى بيطلبوا بإستقلال السلطة القضائية إستقلالا كاملا عن السلطة التنفيذية وده طبعا بعض فضائح تزوير الإنتخابات البرلمانية الأخيرة ،، واللى كان لحركة شايفنكم دور فى فضحها وكانت من أول الجهات اللى أرسلت بيان للنائب العام وكافة الجهات المعنية بأسماء المزوريين .

بس ياريت ما تسألناش كانت ايه النتيجه؟؟؟ لإنها نتيجه مخجله بكل المقاييس،، وهى إن القضاه المزوريين ما زالوا بيمارسوا أشغالهم وأعمالهم وحياتهم عادى جدا،، اما القضاه اللى رفضوا التزوير أحالهم وزرير العدل إلى مجالس تأديبية مختلفة ومنهم المستشار محمود مكى والمستشار هشام البسطويسى اللى الوزير أحالهم إلى لجنه الصلاحية كحدث يحدث لأول مره فى القضاء المصرى ..

عارف تاريخ الوقفه بيمثل لشعب مصر ايه :::::
تاريخ الوقفه دى تحديدا تاريخ صعب بالنسبه لكتير من الأسر المصرية والمعروف بيوم الإستفتاء الأسود التى تم فيه هتك عرض عده صحفيات ومحاميات فى يوم الاستفتاء على الماده 76 من الدستور يوم 25 من مايو الماضى ،، والتى أويدت القضيه فيه بكل أسف ضد مجهول رغم أن صور الجناه ملأت شاشات الفضائيات على مرئى ومسمع من الجميع ..علشان كده إحنا عايزين نحول التاريخ ده لتاريخ سعيد ويكون بداية لنظام جديد فى حياتنا وده مش هايحصل إلا إذا وقف شعب مصر كله واقفه واحده “يقول فيها مش هنقبل التزوير والفساد والظلم وعايزين قضاء عادل ونزيهه ونطالب كلنا بإستقلال السلطة القضائية ” ونقولهم بأعلى صوتنا ” لا لسلب حقوقنا ،، ولا للطوارئ والإعتقالات والحسل والسجن ،، ولا لتكبيل حرية التعبير عن الرأى”

مصر كلها ملك لشعبها وأبنائها وإنت واحد منهم .. أوعى تقول إن صوتى مش هيغير كتير ،، شيل من قاموسك كلمة “مفيش فايده” وخليك متأكد اننا مش عايزينك تناضل ولا تهتف ولا ترفع أى شعارات إسلامية أو سياسية لأننا مش عايزين ثوره ،، كل اللى احنا عايزينه اننا ندافع عن حقوقنا بأسلوب ديموقراطى وحضارى،، وما نسكتش الا لما نستردها ونحقق ولو خطوه واحده ايجابيه علشان تبقى بدايتنا لتحقيق كل مطالبنا بعد كده ..

وخليك فاكر للمره المليون انها اخر فرصه،، ولو ضاعت حياتنا هتبقى اسوء مما تتوقع ومفيش حد هيعمل حساب لحد ،، انت ناسى انهم ضربوا المستتشار محمود حمزه بالجزم قدام نادى القضاه ،، إنت ناسى انهم هتكوا عرض خمس فتيات منهم صحفيه الأسبوع الماضى ،، انت ناسى انهم حرموا مئات الطلاب من دخول الامتحانات ده غير اللى اعتقلوهم ،، انت ناسى ايه اللى عملوه مع اساتذه الجامعات لما حبسوهم داخل الكليه ،،مستنى ايه تانى بعد اللى بيحصل..هو ده بقى حالنا انهرده ،، بس نقدر نغير بكره ،، فيا ريت تدى نفسك فرصه تشوف فيها صوره بكره اللى هما رسموهالنا وعايزين يجبرونا عليها ،، ولما تلاقيها صوره مهلهله واسود من الواقع اللى احنا عايشينه،، يبقى أكيد هتاخد خطوه علشان نقدر نعيش بكره ..