2/10/2007
الجرانين نشرت ، وعنها راح ابو المعاطى مسعود ناصب القعدة ، بعت الواد عبد المؤمن للناس فى بيوتهم فردا فردا ، وبيت بيت ، بيت ابو رحمة منه خمسة وبيت فضالى منه 4 وعزبة النواس منها يجى 9 ، والاستاذ شاكر المدرس والاسطى عليان والاسطى جابر وخمس العمال ، والطلبة الاتنين بتوع الحقوق ، واللى فى زراعة ، واللى فى تجارة ، والشيخ حسن إمام الزاوية والمقدس عبد المسيح ابو سمرة كل الناس اللى بيتجمعوا فى القعدة اللى بتحصل فى بيت ابو المعاطى فى الخميس الأول من كل شهر واللى ناس البلد سموها ( مجلس الحصيرة ) واللى بتبدأ من بعد صلاة العشا لحد وش الفجر ، ينزل دور الشاى ورا التانى ، ويولعوا القوالح ويغيروا الجوزة ، ويسلطنوا القعدة ويبدأو تحيات وسلامات ، وشوية اناشيد ، وبعدين حد ينطق بكام موال ، وتبدأ الدردشة والحواديت فى أى حاجة وكل حاجة ، من أول فلان أبو فلان عمل ايه فى جواز بنته ، لحد عمايل الامريكان فى العراق واية اللى هيحصل مع ايران ، مروراً بالانتخاب ومشاكل الزراعة واخر اخبار قراها حد منهم فى الجرانين ، اخبار الشغل والبيت والاسعار كل واحد بيفضفض وكل واحد بيقول اللى جواه وهو بيسمع غيره واخبارهم ومشورتهم وأحيانا مساعدتهم لبعض …. مجلس الحصيرة ياما حل مشاكل وياما ناقش مواضيع بقى اهم حاجة فى القرية قبل دوار العمدة ومركز الشرطة .
الواد عبد المؤمن ماكدبش خبر ، عدى عليهم كلهم فرد فرد وبيت بيت : ابو المعاطى بيقولكوا لازماً ولابد من كل بد تحضروا بكرة المجلس ضرورى بعد العشا “جاك خابط فى نافوخك ياعبد المؤمن دا بكرة الاتنين مش الخميس يامهبول “.
- عم ابو المعاطى قال بكرة وضرورى ضرورى .
- قالكش ليه ياوله ؟
- قاللى نبه عليهم جميعاً لازم كلتهم يجوا بكرة ضرورى ومن بيت لبيت ومن عزبة لعزبة، بلغهم عبد المؤمن وباتوا كلهم يضربوا اخماس فى اسداس ويفكرا ويخمنوا فى الموضوع ، وليه ابو المعاطى عايزهم الاتنين مش الخميس .
ماكدبوش خبر بعد العشا سابوا اللى فى ايديهم وراحوا على دار ابو المعاطى. ، دار براد الشاى عليهم ، وولعت الجوزة ، وراح ابو المعاطى مقرفص فى قعدته وساب الجوزة من بقه استعداد للكلام . - خير يابو المعاطى .
- للأسف مش خير ياعم فضل ، أنا خايف على قعدتنا دي ياولاد …. ظهرت الدهشة على وجوه الحاضرين اعتقد البعض ان ابو المعاطى بيقدم فى كلامه لموضوع تانى لكن القلق اللى باين على وشه خلاهم يتكلموا …. واحد منهم قال : خايف من ايه يابو المعاطى ؟
- من الحكومة
- حكومة !!! دا باينة بجد يابو المعاطى ، والحكومة مالها ومالنا ، لااحنا مجرمين ولا ارهابيين ، احنا ناس فى حالنا ، والكل كليلة عارف دا ، حتى العمدة عارف دا والمأمور كمان.
- المسألة أكبر من المأمور وما العمدة ، المسألة فى الحكومة ذات نفسها ياولاد ، باختصار فيه حاجتين خلونى اجمعكم هنا النهاردة ، ومنشورين فى الجرانين …. الحكومة بتحل فى المراكز والجمعيات اللى عملينها الاهالى …. أهالى زينا كدة ؟
- سأل جودة الفلاح : مراكز ايه وجمعيات ايه اللى بتحلها الحكومة يابو المعاطى وهتحلها ليه ؟ وفين الكلام دا ؟
- استاذ شاكر المدرس قال : أيوة فعلاً أنا قريت كذا خبر عن المواضيع دى ، الخدمات العمالية قفلت ، وبعديها جمعية تانية اسمها المساعدة .
- علق المقدس عبد المسيح : بس دى من اسمها كدة أماكن بتعمل خير ، أماكن خير يعنى ، واحده بتعمل خدمات والتانية بتساعد الناس …. هيقفلوها ليه ؟
- تدخل محمود ابو رحمة طالب الحقوق قائلاً : لأ يا مقدس هما صحيح بيعملوا خير بس خير مش عايزاه الحكومة واحدة منهم اللى اسمها دار الخدمات واقفة مع العمال اللى بيتظلموا من أصحاب العمل ، بيرفعولهم قضايا ويكتبولهم شكاوى وبيعلموهم ايه هى حقوقهم وازاى ياخدوها لو حتى بالاضراب عن العمل وازاى يعملوا نقابات وبيكتبوا نشرات عن العمال وعن الاسعار والخصخصة وانت عارف … أصحاب المصانع همه والحكومة اخوات وولاد عم ، يعنى ليهم ميت ضهر فى الحكومة ؟ والعمال والغلابة، زى ما أنت راسى ، مالهومش أى ضهر او سند ، والحكومة عايزة اللى يقول امين مش عايزة اللى يقول اشمعنى … وبتوع المساعدة شغالين فى موضوع بيبين الافترا والظلم بتاع الحكومة وبيشتغلوا علشان وقف التعذيب يامقدس … مش التعذيب بتاع ربنا ، التعذيب بتاع الظباط والمخبرين ، العروسة والفلكة والكهرباء وغيره الظباط اللى بيمسكوا اهالينا بسبب ومن غير سبب وبدال ما يعاملوهم على انهم بنى أدمين يربطوهم زى البهايم ويعلقوهم كأنهم دبيحة فى الاقسام وهاتك يا ضرب وتعذيب ، بالايدين والرجلين ، والشوم وطفى السجاير والكهرباء . والناس بتموت فى ايديهم ، كتير ما بتستحملوش الافترا دا كله . بعد التعذيب بتبقى الناس نفسها مكسورة وجريحة وخايفة ، وماحدش من اهاليهم من خوفة بيروح يشتكى بتوع المساعدة شجعوا الناس دى وقووهم ، وبيعملوا لهم شكاوى ضد الضباط وبينشروا اللى بيحصل ويفضحوا الظباط ويعرفوا الدنيا كلها عمايل وظلم الحكومة . الحكومة بتقول مفيش كلام من دا وكل الناس بخير ، وهما بيكشفوها ويبينوا كدبها وظلمها .
- ما هى دى حكومة برضة ، والكبير كبير ياسى محمود .
- مفيش كبير وصغير ، كلنا فى القانون واحد ، محدش يكبر على حد يبقى الاتنين بيعملوا خير فعلا ، بس دا خير ملوش طلب عند الحكومة ، مش عايزاه ولا عايزة حد يعمله .
- تمتم شيخ الزاوية : ياخفى الالطاف نجنا مما نخاف .
- الاسطى جابر : ايوة ، انا ليا زميل من حلوان وكلمنى عالدار قال بيعملوا قضايا للعمال ، وبتعملوا ندوات علشان يوعيهم بحقوقهم وعاملين فرع فى المحلة بس يا خسارة الحكومة قفلتهم .
- سأل سماعين ابو نوس بدهشة : كل دا كويس ، احنا معاك ان فيه ظلم وفيه افترا بس احنا مالنا ومال الكلام دا ؟
- زعق الاسطى عليان غاضبا : جاك خابط فى نافوخك ياسماعين ، مالنا ازاى مش احنا الناس الغلابة اللى بيساعدوهم الناس دول ، ولا انت بقيت من الكبارات يا وله ، مش ديك النهار شدوا ابن عمك من الشارع واعتقلوه وبهدلوه مش لو كنا نعرف بتوع المساعدة دول مش كانوا ساعدونا ووقفوا معانا احنا ملناش حد فى البلد يقف معانا ولا الكبار بيسألوا فى اللى زينا ، قال مالنا قال .
- تدخل ابو المعاطى : احنا مالنا ومالنا يابو نوس ، الحكومة ما دام قفلت الدار وحلت المساعدة ، يبقى مش بعيد تدورا على قعدتنا دى ويقولك مجلس الحصيرة دا ابصر ايه ومش قانونى وممنوع ومش بعيد يقفلوا باب الحوش وما يخلوش حد يقرب يمته .
- علق شيخ الزاوية : اعوذ بالله يابو المعاطى ، احنا ارتكبنا منكر ولا خالفنا قانون او شريعة هيمنعونا ليه .
- ابو المعاطى : ما هى دى المشكلة يامولانا ، يعنى هما الناس ارتكبوا منكر او خالفوا القانون والشرع ، المنكر انك تاكل حق الناس وانك تظلمهم وتاخدهم تعذبهم ، مش انك تساعدهم وتوعيهم .
- تدخل محمود ابو رحمة فى الحديث : ابو المعاطى عنده حق يا مولانا ، واحنا منفرقش كتير عن الدار او الجمعية او اللى زيهم ،همه مش ناس من الحكومة همه اهالى زينا لموا بعضهم وفكروا فى مشاكل الناس ، وحبوا يعملوا حاجة عشان يساعدوهم ، واحنا فى قعدتنا دى برضه بنتناقش وبنفكر وبنساعد بعض وبنقف مع بعض مش ديك النهار عملنا وقدمنا شكوى وكنت انت معانا يامولانا ورحنا قابلنا العمدة والمأمور وبتوع المجلس المحلى عشان الحوادث اللى بتحصل عالطريق السريع وبتضيع فيها ارواح ، مش احيانا بنكتب عرايض، مش بنقعد نتكلم مع بعض ، ونوعى بعض ، الفارق بينا وبين بتوع الدار ولا بتوع المساعدة ان احنا بنعمل دا بظروفها ولما نجتمع مع بعض ، وعلى قد امكانيتنا انما همه ناس متفرغين للموضوع وبيساعدوا اللى زينا وغيرهم وعندهم محامين وصحافة وبينشروا كتب وغيره بس همه واحنا تنظيم من الاهالى وعشان خاطر الاهالى – قال فلاح من اهالى العزبة :
تنظيم ايه ومدرك ايه ياسى محمود ، انت عايز تحبسنا ولا إيه . - محمود : التنظيم مش بس احزاب وسياسة ، النقابة تنظيم ، الجمعية تنظيم ، الناس اللى بتتلم مع بعض عشان هدف معين دا تنظيم ، ودا حق لكل الناس يعملوا تنظيمات عشان يحققوا بيها اللى همه عايزينه ، بتوع حقوق الانسان بيقولوا كدة ، من حق كل الناس انها تجتمع وتعمل جمعيات وتنظيمات ونقابات ما دامت اهدافهم سليمة ووسائلهم سليمة من غير عنف او سلاح يعنى.
- أحد الفلاحين من اهل العزبة قال : طاب ماحنا مجتمعين اهه ولا فيش مشاكل ، يبقى خايفين من إيه ؟
- قال ابو المعاطى : ما هو الاجتماع دا مش قعدة وبس ، ده قعدة ناس بتفكر فى أحوالها ومشاكلها وبتدور لها على حل ، وطبيعى هنلاقى نفسنا بنتكلم فى السياسة ، اسرائيل والعراق والانتخابات والبطالة والزراعة والاسعار والمحاصيل وعمايل الحكومة وفى كافة شىء ، مش دا بيحصل ولا هيخرسونا يعنى .
- أستاذ شاكر : عندك حق يابو المعاطى ، الحكومة عايزة شعب اخرس ومشلول ، لا ينطق ولا يتحرك ، احنا فعلا فى مركب واحدة مع بتوع الدار والمساعدة ، وأى بنى أدمين بتحس وتفكر وعندهم كرامة هتحاول تعمل حاجة عشان خاطر حق الناس ، وعشان خاطر الافترا والجبروت بتاع البوليس .
محمود : صح يا استاذ شاكر ، كلامك صح ، لازم يبقى لكل الناس الحق فى انهم يعملوا الاجتماعات اللى عايزينها ويعملوا تنظيمات ويعبروا عن نفسهم ، احنا مش بقر إحنا بنى آدمين ولينا حقوق . صاح محروس الفلاح وكأنه اكتشف اختراع . - ايوة لازم يبقى فيه قوانين تدينا الحق دا .
- اجاب محمود فى هدوء : ما هو فعلا فيه قوانين يا محروس بس للأسف القوانين دى حطها مجلس شعب كلنا عارفين جه ازاى وحصل ايه للقضاه لما قالوا دا فيه تزوير ، عشان كده القوانين بتتعمل بعيد عن الناس وعن مصالحها، وبطريقة تحرم الناس من ممارسة حقوقها مش تديها حقوقها ، فيه حق عمل أحزاب بس القانون عمل لجنة ترفض انشاء الاحزاب وكمان تحلها او تقفلها لو عايزة ، وفيه قانون عمل جمعيات بس لازم موافقة الحكومة وموافقة امن الدولة وبتتحكم فى شغلها ، وبرضه تقدر تقفل الجمعية فى أى وقت وكمان فيه حق للنشر والتعبير بس اللى يتجرأ ويتكلم بشجاعة يبهدلوه ويحبسوه وممكن يقفلوا الجريدة او يصادروها كل حاجة عليها قيود بتخنقها ، وكله بالقانون ، قوانينهم بتتنفذ عالغلابة فيطردوا الفلاحين من الارض بقانون ، ويشردوا العمال بقانون ، ويسيبوا الاسعار تولع بقانون ، يعتقلوا الناس من غير سبب بقانون ، قانون عاملينه على مقاسهم ومصالحهم وعاللى همه عايزينه بس ، احنا عايزين حرية ، عايزين برلمان مفيهوش تزوير وحكومة جاية بإرادة الناس مش مفروضة عليهم حكومة تراعى حقوق الناس مش تجور عليها .
ابو المعاطى – الظاهر يا ولاد ان الهوجة بتاعة الانتخابات والوعود الانتخابية خلصت ، ورجعت ريما لعادتها القديمة ولسة اللى جاى أصعب ، فلا تغيير ولا اصلاح ولا دياولوا كله طلع كلام فى كلام ولزوم الانتخابات والضحك عالدقون ، صدق اللى قال بيضحكوا علينا ومش هيصلحوا حاجة ، صحيح دى وسية هيسبوها ازاى بالساهل ولا يسيبوا حالها يتعدل ، بس برضه إحنا الغلطانين ، قعدنا نمشى جنب الحيط لحد ما بقينا مش باينين ولا حد عامل حسابنا حقوق ايه ياسى محمود والحكومة قفلت احزاب وجرايد ، حبسوا صحفيين ، اهانوا الرجالة والستات ، ضربوا اعضاء فى البرلمان فى عز الضهر ، طبعا يا ولاد مش غريبة على حكومة من الكبار وأصحاب الأموال ان يعملوا كل ده ، يعتقلوا الناس ويفرضوا الطوارىء ويمنعوا الاحزاب والجمعيات من عملهم ، ويرفعوا الاسعار ويطرد والعمال والفلاحين من شغلهم …. سلامات ياحاج اصلاح … سلامات ياحاجة تغيير …. سلامات يا بلد . - هنا تدخل عبد العاطى وقال مفيش حل غير بأننا نتحرك زى عمال المحلة … خلاص الحكومة نسيتنا وحقوقنا مش هترجع لينا غير بالمطالبة بيها وبالكفاح والتعاون مع بعض والتحرك الجماعى واستخدام كل الوسائل السلمية من إضراب واعتصام وتظاهر لكفالة حقوقنا وحمايتها واستطرد الاستاذ شاكر صدقونى يا جماعة محدش هيسأل فينا تانى ولا هيفكر يرجع لينا حقوقنا من الحكومة ، لازم احنا نتحرك ونطالب بحقوقنا فى الحالة دية بس ممكن نحافظ على مجلس الحصيرة وعلى كرامتنا ……….. فى الحالة ده بس ممكن تعرف الحكومة ان احنا بنى أدميين لينا حقوق ولازم نأخذها ….
فى الحالة ده بس ممكن تنهض بلدنا ويتعلم عيالنا ويتعالج مرضانا ونتلاقى شغل وسكن ومياه شرب وغذاء نظيف لاهالينا ….. فى الحالة ده بس ممكن نرفع رأسنا زى باقى الشعوب ونفتخر بأننا بنى أدميين … من حقنا أن نحيا بحرية وكرامة وأمان .
لمزيد من المعلومات يرجى الاتصال بالمركز
المركز يقدم الدعم القانونى مجاناً ويتلقى كافه
الشكاوى المتعلقة بحقوق الفلاحين والعمال
والصيادين والمرأة والأطفال فى الريف
المصرى وذلك على العنوان التالى :
122 ش الجلاء برج رمسيس القاهرة ت/ف 25750470
E-Mail:Ichr@thewayout.net – Ichr@Ichr-eg.org
Web site:www.Ichr-eg.org
لفلاحين فى أمان الزراعة وتوفير الغذاء للمواطنين .